شروط التسجيل في منتديات كواليس :

 1 / حيّاك الله عندنا ضيف عزيز وغالي .. وهذي الساعة المباركة اللي شرفتنا فيها ... وترانا في كواليس ننبسط لين شفنا الواحد جاي يبي الفايده والوناسه .. يعني مانبي واحدن يبي يخرّب والا كل ماطق عود بحصاة قال ( وعدنا في الطَلِعه ) وراح وسجّل باسم ثاني وبدا يسحّب رجليه ويذبب كلام ماله داعي .

 2 / حريصين جداً في منتديات كواليس أننا نطّلع على كل صغيرة وكبيرة ونُلمّ بأكبر عدد من المُشاركات وندقق فيها .. لكن ( العين ماتعلى على الحاجب ) وبعض المرّات مانقدر نسيطر على الوضع .. لذلك ترانا نُخلي مسؤوليتنا عن أي شي ماله داعي وكُل ماطُرِح إنما يُمثّل وجهة ورأي نظر الكاتب ( اللهم أني بلّغت اللهم فاشهد ) .

3 / ممنوع الكلام في الدين أو التعليقات اللي مهوب زينه أو الكلام في الثوابت والطوائف والرموز أو الكلام في المشايخ والعُلماء والتهكّم بهم واللي يجي واحد ويقعد يستخف دمّه ويبينا نضحك عليه هو ووجهه المخيس .. وترى المنتدى ( سُنيّ ) وعلى منهج السُنّة والجماعة نمره واستماره .. وترى راعي المنتدى ماقد راح للقطيف إلا مرّه وحده عشان يشتري سمك .

 4 / للمشرفين والمشرفات الحق في نقل الموضوع أو تعديله أو صنفرته .. نظراً لحاجة التقسيمات المذكوره آنفاً .

 5 / قسّمنا المنتدى إلى أقسام .. شيّ خاص بالهبال والوناسة وشي خاص بالحريم والأرامل والمُطلقات وشي خاص بالجوّالات وشي خاص بالاقتصاد وكل شيّن عطيناه حقّه .. عشان كذا مانبي واحد يروح يكتب موضوع عن الكمبيوتر في القسم السياسي أو تجي وحده وتكتب مشكلتها مع المكياج التقليد في قسم منتدى الرياضة المحلية .. مانبي كذا .. نبي ترتيب وشغل متكتك .. واللي بيخالف هالنقطه راح نعلّقه على باب المنتدى ونفشّله ثلاث شهور ونص !

 6 / الكلام اللي ماله داعي ( ماله داعي ) واللي نشوفه يعلّق أو يذبب كلام مهوب زين على غيره يتحمّل مايجيه ويمكن ترى نجتمع عليه من أعضاء ومشرفين ونجلده .

7 / يجب التسجيل في المنتدى بأسماء مُناسبه .. ومانبي اسم فيه ( إخلال بالأدب ) أو ( مدري شسمه ذاك وذاك ) .

 8 / ممنوع تكرار الموضوع في أكثر من قسم .. قسم واحد يكفي .

 9 / اللي يلاحظ مُلاحظه على مُشرف أو عضو ممنوع أنه يشرشحه ويكتب عنه علناً في المنتدى .. فيه شي اسمه ( إدارة ) رح أشتك عندهم وهم ياخذون حقّك .

 10 / التسجيل لأجل الإعلان عن منتدى ثاني أو لأجل مشروع تجاري .. ممنوع .. إلا إذا نسّق مع الإدارة وخذ تصريح بهالشي . ذيك الساعه يحط اعلان في كل مكان ولو يبي على جبهته .

 11 / اللي يستخدم الرسايل الخاصه في حركات مهوب زينه تراه بيندم وراح نشتكيه عند اوباما عشان يوريه شغله ويطلق عليه التسلب اللي عنده .. وللعلم ترى عندنا دبابيس في المنتدى وياكثرهم كثراه .. يعلمون المشرف آية الله : مدمن شاهي . قدس الله روحه .. بكل شي .. ياويل ويلاه من طاح في يدي !

 12 / ممنوع ثم ممنوع أن الواحد يسجّل معنا بكواليس بإسم يحتوي على كلمة ( مدمن ) أو ( مدمنة ) .. أنا اللي اسمي بس مدمن شاهي ... ايه وبعد ممنوع احد يسجل باسم كواليس او يحط لي اسم من كلمتين وحده من الكلمتين فيها كواليس .. أو يسجل باسم مهوب مفهوم أو كلّه رموز وخرابيط .. وترى اللي يخالف هالبند بالذات ترانا ماراح نشاوره وبنقضبه الباب على طول .

 13 / الناس اللي تحب ( النسخ واللصق ) .. ترى الشغل هذا مانحبه في ( منتديات كواليس ) .. نحب الجميع يبدع ويكتب لو شي بسيط من عنده . * تنبيه : ترى عندنا ترقيات .. من عضو بقراطيسه إلى عضو متلطم ثم يترقى ويوصل مرتبة أنه يكون ( عضو رسمي ) ثم ( عضو شاد حيله ) ثم يصير ( عضو معزّب ) ثم يستاهل ( أنه يصير عُمدة الكواليس ) وأخيراً راح يعلّق مرتبة ( من شيوخ الكواليس ) ثم يحط لنا عزيمه في استراحه .. للرجاجيل مفاطيحن مباركه وللحريم بوفيه مفتوح وخمس صياني حلى .

 14 / نمنع منعاً باتاً البتاتن كتابة اكثر من موضوع في القسم الواحد لليوم الواحد . يعني اكتب موضوع واصبر لك فترة وارجع شيّك عليه ورد على العالم اللي ردّت عليك . وترى بانقرشع المواضيع اللي نشوفها مكرره لنفس الكاتب .

 15 / أي موضوع بيكون عليه صور وعلى الصور روابط خارجيه .. أو كانت الصور ومن خلال المرور عليها توجه الشخص إلى مركز تحميل ثاني راح يتشنقل الموضوع للقراشيع لأن عندنا مركز تحميل على هالرابط : www.coalles.net .. يقدر الواحد يحمّل عليه لو يبي بعارين .. مركز خفيف وحلو ويفتح النفس ..

راعي الحلال : مُدمن شاهي

( قلب أحمر )