المكان : غرفتي المتشطّره . سرير نفرين عشان آخذ راحتي فيه + دولاب واحدن من بيبانه مخلوع ومتعيجزن اربطه + كمدينه عليها عطرين واحدن منهم قاضي والثاني ماأقدر استخدمه عشان راسه انفك وضاع + أبجوره عليها صورة قلوب وشفايف جايتني هديه من خالتي الجوهره يوم اتخرج من الثنوي وشبكتها بـ 220 وخربت وتحسفت انطلها وقلت اخليها جنب السرير عشان تعطي للغرفة شكل + كرتونين بيض مليانه معاليق ملابس + ساعة جدار من دون عقارب .

الزمان : الساعة 2.30 ، أوّل مرة اسهر من ثلاث شهور عشاني طول النهار راقد يوم قضينا من ذبح الضحايا .

سبب الكتابة : من زمان ماكتبت شي وودي عاد اليوم اكتب دام ان ماعندي شغل وعمتي هيا قبل شوي داقتن علي تسولف عن ضحيتهم اللي قطّعو كرشتها اليوم ووصخة بيتهم ( الله من زين السوالف بعد ) وقالت لي اكتب موضوع وجب طاريي .
هيا ذي لو انها مهوب عمتي كان واعدتها بسوق ريمان ثم خطفتها ورحت بها للجسر المعلق ونطلتها . بس برّن في أبوي مانيب متعرّضها ههههههههههههه

سكينة أبوي طويلة ! ( الموضوع برعاية أكياس نايلون مقاس 14 ام ربطه )

مثل كل سنة . نصلي العيد بالجامع التسبير .
انا وابوي وامي وخواتي الثلاث واللي وحدتن منهم عقب كم اسبوع تبي تطسّ وتروح مع رجلها .
عاد تخيلو . هي تكتب معنا بالمنتدى وتقول لي دايم ( ياربييييه شلون اصبر على فرقاكم ) وانا اقول بنفسي ( قسم بالله يامفارقك عيشه هههههههههههه ) لارُتبه لامواضيع زي الناس لا مشاركات زي الخلق وكل ماهذا قاعدتن تحشّ بنص الاعضاء انهم مايعرفون يكتبون
خذها يازوجها حلّ حلال الله يمنيّك ببركتها .. وترى انواع حومة التسبد منك يوم تجي تشوف اختي النظرة الشرعية وانا جالسن جنبك وانت تتفرج عليها وانا من داخلي أغلي وكني مير جدارن عندك ماستحيت مني
يقطع أم القهر . أختي شعرة قلبي داخلتن بكامل زينتها عنده وهو يطالع فيها وانا جنبه كني العصير اللي جابته اختي وحطته على الطاولة هههههههههه
ليته شرق بالعصير واستغليت ذيك الثانية وأشّرت لاختي انها تروح بسرعه قبل ماأقطّعه بسكين خضرة .
بس اشوا انه بياخذها . أخفّ على قلبي شوي

طلعنا من البيت الساعة 6 الصبح على ماأعتقد . ماأذكر بالضبط بس الوكاد اني ذيك الحزّه كنت مشخّصن بالثوب وطاقّن الغالوقه ولابس الكبك زين وحاط القلم مرصوص عشان يعرفون الناس كيف ان الواحد ولو كان بعيد الأضحى لزوم يشخّص ( سامعن عمي قبل سنتين يقول ان اللي يشخص بعيد الاضحى تراه رخمه لأنه مهوب وقت تشخيص وان العيد مافيه إلا كرف وذبح ضحايا . مدري على أي مذهب بصراحة عمي ) .

يوم وصلنا الجامع يوم ننتثر . الحريم بصوب والرياجيل بصوب

من سوء حظّي كالعادة انه صار على يميني باكستاني وعلى يساري هندي عرفت قبل يبدا الخطيب بخطبته انه يشتغل بمشغل نسائي لأن وجهه ويديه مليانه لمعة فستان وردي .
دخل الخطيب وكبّر . مير يفزّون الخلق وبدت الروايح من اللي على يميني ويساري تفوح وانا اقول بنفسي : اللهم طوّلك ياروح ويارب انه يقرا اقصر السور عشان نخلص بسرعه ويمشون لأني اخبرهم مهوب يعترفون بالخطبه .
قضت الصلاة وبدى على وجهي النور يسطع هههههههههههههههههههه
حسيت اني بادخل الجنة الله لايضرني لأن الإيمان وصل لأعلى مستوياته قافزاً حاجز الـ 312 بمُعدّل استغفار واحد في كل ثانية .
يازين الخشوع والشمس توّها ظاهره والعصافير تزنّ على شجرة في بيت جنب الجامع والناس تكبّر وتهلل وكلّن يدعّي ربّه .
أزين شي أني ماخذن هالسنة معي مسواك طولي ثلاث مرات ومتعفّطن لين قال آمين كنه المطبّ الصناعي اللي ببداية شارع الابراج .
كل سنة يشغلني جوّالي عشان هالرسايل اللي تتوافد من كل مكان . بس هالسنة غير . جا المسواك واشغلني ونظّفت لثّتي تنظيف مهوب طبيعي حتى اني يوم رجعت للبيت حسيت ان البرطم السُفلي طايحن نصّه من الحماس هههههههههههههههه

قام يخطب بنا الخطيب عن فضل العيد وانه ازين شي بالسنة وان الواحد لزوم يرجع لربه ويخلي عنه الردى ( سهم يمشي مليون ورايحن لقرم ) .. ثم آخر شي قام الشيخ يلعّن الحوثيين ههههههههههه والله ياهو حاقدن عليهم . ثم قام ودعى الله انه يجينا غيث ومطر وقلت في نفسي ( ديرتن فيها العاقل المعقول ماهقا بيجيها شي ) .

ثم قضى من الخطبة وقمنا ورحت آخذ خواتي . عاد انواع حومة التسبد في هالحريم . يالله يطلعون ويالله يمشون كنهم يمشون على قواطي ميرندا .
عجزن متناثرات وبناتن يتمخطرن وكل وحده مشخّصه بشنطتها كنها رايحه لسوق وبزارين جايبينهم اهلهم للجامع عشان يعطونهم العجز ريالات بشناطهم ههههههههههههه يعني ترانا نعرف حركاتكم يالحريم . قالو ايش . قالو نبي البنيّات الصغار يستانسون بالشناط

ركبنا الموتر وتحاشرنا فيه وكل واحد حب راس اللي اكبر منه . تمنيت اني اصير الابو بالسيارة عشان اخليهم كلهم يحبون راسي

من ركبنا وابوي يهاوش !!
اكتشفت من هالحركة انه جالس يحمّي عشان عقب شوي يبي يتطارح هو والمربرب اللي بالحوش .

عطونا الضحيّه . هاتوها . سدحتها وبركت عليها . وجا ابوي ودفّ فخذي من باب الحقران وانك ماتفهم بالذبح ههههههههههههه قسم بالله اني وش حليلي واني متحمّسن معه بس مدري ليش دايم الابوان عندنا يحقرون عيالهم .
يمكن عشانهم يومهم صغار محقورين وقاعدين ينتقمون منا . ياويلكم ياعيالي . باقعد ارفّس فيكم لين اشبع . هماه ابوي كان يسوي بي كذا يوم كنت شباب وشنبي خاطن مترين عرض

بسم الله . اللهم اجعل ثوابها عني وعن امي وعن فلان وفلانه وفلانه .. وقام يسرد اربعين اسم اول مرة اسمع فيهم . ثم قطع رقبتها وتناثر الدم .
تمنيت اسمعه يقول اسمي مع القائمة غديني آخذ اجر معهم بس شكله ناسي اني مضاف معه بكرت العايلة

رفعنا الذبيحه . سلخناها ويوم بدنيا نوصل للبطن سحبت عمري وقلت لابوي : باروح اجيب خبز .
هذا يقطّع وهذي تكسّر وهذيك تدعس باكياس اللحم وكل شوي رانّ جرسنا من الجيران وجايبين لنا لحمة وعظمين يابسة .
واحد من جيراننا ياهو دلخ . كل سنة يرسل لنا رِجِل . عاد المشكلة اننا مانبي الرِجِل . والعام لمّحنا لهم وارسلنا لهم شوي من الصدر نبيهم يعطوننا من صدرهم مع اني احسّ ان ضحيتهم تسلب لأن التسلب ماله صدر ههههههههههههه كذا على طول عظام من فوق لتحت .
المهم يوم جت هالسنة وقلت لامي ارسلو لهم صدر بسرعة قبل مايرسلون لنا رِجِل . وارسلنا لهم على طول ويوم جت الساعة تسع ويرسلون لنا رجل ويد ههههههههههههههه
قلت لامي شكلنا السنة الجاية ان ارسلنا لهم صدر بيرسلون لنا رجل وحدتن من بناتهم من زود الدلاخه . فكينا منهم ودقي عليها وقولي ترانا ماناكل رجلين الله يطوّل بعمرك

جبت الخبز عقب نص ساعة عشان افتك من خياس الكرشه ويوم جيت آلاهم قاضين وقاعدين يفرشون السفره .
كبده مشويه . كبده مطبوخه . كبده محموسه . كبده على الصاج .
ماعاد باقي إلا يعلق ابوي لوحة على باب البيت ويكتب عليها ( نُقدم شوربة مع الكبده )
فلفل . وبهارات . ومرقه . وخبز حار .
شاهي . حليب شاهي . حليب شاهي بالزنجبيل . حليب شاهي بالزنجيل بالعسل
ابوي ياحبني له يحط كل شي بالبياله وماعاد باقي إلا يحط الكبده فيها ثم يكبّها في بطنه وصلى الله وبارك

سمّينا وكلنا . ثم قامت امي تتسذب علينا كعادتها السنوية الله يطوّل بعمرها وتقول : اني يوم كنت صغيرة وشعري منتثر من ورى كان ابوكم يطالع فيني وخاق معي ثم قام يشّر لي بجوّاله ويقول شغلي بلوتوث ورقّمني ثم كلمني ثلاث مرات وانا بالسطح فوق في بيتنا لين تقدّم لي . حتى انه مرّه قال لي ورى مانطلع سوى في حديقة الجفيره اللي عند مدخل الدلم واني قلت له : ان ابوي ماعودنا على ذي الحركات وانه بعد مركّب العربسات بس بالملحق وحاذفن كل القنوات إلا الذهبيه عشانهم يجيبون فيها أناشيد ابو خاطر ههههههههههههههههههه
وقامت بعد تقول لنا عن سواليفها يوم جا ابوي ياخذها وانها استحت منه يوم سألها عن اسمها وكذبت عليه وقالت له اسم خويتها ثم يوم تقدّم لها وجا يضيفها بكرت العايلة صار الاسم غير وصارت سالفة طويلتن عريضة وجا يشوفها مرتن ثانية وسألها عن اسمها واعترفت له بالحقيقه ههههههههههه

المهم كانت السوالف زينه اليوم والله يستر من تاليتها باتسر .

* تهاني خاصة :
- للشعب الكريم في كواليس .
- لامي وابوي واخواني وخواتي بالبيت .
- لبنت عمي اشواق واقول : ترى ماكل من سكن بالشمال صار كشخه .
- لعمي ناصر واقول : انت عيدي كل يوم .
- لفهد بن محمد واقول : لاعاد ترسل لي كول مي تراك اذيتني الله ياخذك .
- لام حمد وام علي واقول : الله يشغلكم ان كانكم اشغلتو امي كل صبح بهالمسايير البايخه .

كل عام وانتم بخير . وكل سنة وانتم احسن من اللي قبلها ،

تصبحون على خير